Working Group Minutes / Canola / 24 November 2016

Notule

Canolawerkgroepvergadering

gehou te Kronenburg, Paarl op 24 November 2016



  1. Opening

    Dr Jos de Kock open die vergadering met gebed.

  2. Verwelkoming

    Die Voorsitter, Mnr GJH Scholtemeijer, heet die teenwoordiges welkom by die laaste vergadering van 2016. Hy heet in die besonder vir Mnre Oosthuizen en Van Dyk van RovicLeers en vir Prof Brand welkom.

  3. Presensie

    Teenwoordig

    Mnr GJH Scholtemeijer Voorsitter
    Prof A Agenbag PNS
    Mnr K Blanckenberg GraanSA
    Mnr P Blom SSK
    Prof T Brand US
    Mnr J Bruwer Bayer
    Mnr RJ Burger KaapAgri
    Mnr L Coetzee KaapAgri
    Mnr G Conradie DLWK
    Mnr C Cumming PNS
    Dr J de Kock PNS
    Me M du Preez PNS
    Mnr G Els K2Agri
    Mnr P Fouché PhytoEnergy
    Mnr D Hanekom Agricol
    Mnr W Heunis OverbergAgri/MKB
    Mnr F Human OverbergAgri
    Mnr J Kellerman Barenbrug
    Mnr G Keun PNS
    Dr S Lamprecht LNR-NIPB
    Mnr P Laubscher OverbergAgri
    Mnr F le Roux SOILL
    Me I Leygonie SOILL
    Mnr P Lombard DLWK
    Mnr J Loubser PNS
    Mnr J McDermott Pioneer
    Me Y Papadimitropoulos PNS
    Mnr S Slabbert DLWK
    Me A Swanepoel DLWK
    Dr P Swanepoel US
    Mnr A Theron PNS
    Me E Harmse PNS-Kontrakteur

    Op uitnodiging

    Mnr P Oosthuizen RovicLeers
    Mnr D van Dyk RovicLeers

    Verskonings

    Mnr H Cerfonteyn DLWK
    Dr M le Roux US
    Me L Smorenburg DLWK
    Dr J Strauss DLWK
    Me L van Zyl Sekretariaat

  4. Personalia

    Geen.

  5. Vasstelling van die sakelys

    Die sakelys word aanvaar, sonder enige wysigings of toevoegings.

  6. Notule van die vorige vergadering

    Die notule van die vergadering gehou op 23 Augustus 2016 word as gelese beskou en goedgekeur.

  7. Algemene oorsig

    1. SAGIS Inligting

      Kennis word geneem van die nuutste uitgawes van SAGIS se Weeklikse Bulletin en Maandelikse Data.

    2. Oesskattings

      Kennis word geneem van die data wat die Oesskattingskomitee saamgestel het rakende die produsentevoornemens om somer­gewasse te plant in die 2016-2017 produksiejaar, van die oppervlakte- en produksieskattings van wintergewasse in die 2016 produksie­jaar, en van die datums waarop die Oesskattingskomitee in 2017 sal vergader.

    3. Winterreënvalstreek

      1. Swartland

        Daar word rapporteer dat die Swartland oor die algemeen baie goeie canola-oeste gehad het, met canola wat uiters goed herstel het na die vroeë stremmingstoestande. Daar sal na verwagting meer canola in die komende seisoen geplant word, welke tendens grootliks gedryf sal word deur 2016 se goeie opbrengste.

      2. Suid-Kaap

        Daar word voorts rapporteer dat die OverbergAgri-gebied weereens bogemiddelde koring-, gars- en canola-opbrengste gehad het, met canola wat uitsonderlik presteer het. Die enkele lae canola-opbrengste kan moontlik toegeskryf word aan produ­sente wat nie gespuit het teen Sclerotiniabesmetting nie. Talle produsente het canola-opbrengste van meer as 2 ton per hektaar behaal.

        Mnr Le Roux noem dat gemiddelde opbrengste van 1,7 ton per hektaar in die Swartland behaal is, en 1,8 ton per hektaar in die Suid-Kaap. Hy sê dit wil voorkom asof 'n 40% groei in canolahektare in beide die Swartland en in die Suid-Kaap in 2017 verwag kan word.

        Mnr Bruwer waarsku daarteen dat té vroeg gespuit word teen Sclerotinia.

    4. Somerreënvalgebied / Oos-Kaap / Ander

      Die Voorsitter rapporteer dat geen canola aangeplant is by die Eastern Cape Development Corporation (ECDC) se projek in die Oos-Kaap nie.

      Dr De Kock noem dat canolacultivarproewe in die somerreënvalgebied onder besproeiing aangeplant is. Hy sê vier cultivars is op drie plantdatums by Beestekraal, Groblersdal en Vaalharts aangeplant. Hy noem dat die proefresultate ingewag word, waarna besluit sal word oor die voortsetting van daardie proewe.

    5. Prysinligting

      Kennis word geneem dat die waarde van canola afgelei van sojaboonoliekoek (47% proteïen) geland in Kaapstad op 15 November 2016 soos volg daar uitsien:

      47% Proteïen teen 'n waarde van R5 859 per ton en 'n wisselkoers van R14,48 – die relatiewe waarde van volvetcanola is dus:

      Pluimvee (94%) R5 507 per ton
      Varke (100%) R5 859 per ton
      Suiwel (58%) R3 398 per ton

      en die relatiewe waarde van canola-oliekoek is:

      Pluimvee (53%) R3 105 per ton
      Varke (65%) R3 808 per ton
      Suiwel (60%) R3 515 per ton
    6. Weervooruitskatting

      Geen verslaglewering.

  8. Navorsing

    1. Nasionale Cultivarproewe 2016/2017

      Mnr Lombard rapporteer dat die proefresultate tans verwerk word. Hy sê opbrengste van meer as drie ton per hektaar is vir die eerste keer in drie proewe in die Swartland behaal, met 'n hele paar Suid-Kaapse proewe wat ook meer as drie ton per hektaar gemiddeldes behaal het.

    2. Biobrandstowwe

      Kennis word geneem van die verslae "Nuusberigte en tendense in die biobrandstof en oliesadebedryf: tweede kwartaal, 30 Junie 2016", "Nuusberigte en tendense in die biobrandstof en oliesadebedryf: derde kwartaal, 30 September 2016" en van die twee artikels wat ook ingesluit is as deel van Bylae E.

    3. Riversdal projek: korter wisselbousiklus

      Kennis word geneem van die verslag wat Dr Strauss saamgestel het oor die korter wisselbousiklusnavorsing wat by Riversdal gedoen word, en oor die inligtingsdag wat daar aangebied is.

  9. Tegnologie oordrag

    1. Canolafokus

      Kennis word geneem van die Oktober 2016-uitgawe van die Canolafokus.

    2. Inligtingsdae 2016

      Kennis word geneem dat die volgende inligtingsdae beplan word:

      15 Maart SKOG-voorsaaidag
      23 Augustus Riversdalse Inligtingsdag
      31 Augustus Roodebloeminligtingsdag
      5-6 September Proefbesoekee: Suid-Kaap en Swartland
      7 September SKOG-dag
    3. Video-opnames

      Die Voorsitter verneem of die videos wat op die PNS se webblad gepubliseer is gebruik word. Dit wil voorkom asof die videos nie veel aftrek kry nie. Daar word genoem dat die videos moontlik meer gebruik sal word, indien die onderskeie rolspelers attent gemaak word op die beskikbaarheid daarvan.

    4. Oilseeds Focus

      Kennis word geneem van die nuutste uitgawe van die Oilseeds Focus.

    5. Canolasimposia 2016

      Prof Agenbag noem dat die Canola Growers' Manual, wat gepubliseer is deur die Canola Council of Canada, omvattende inligting bevat oor die mate waarin 'n canolaplant reageer teenoor veral stremmingstoestande, en spesifiek 'n vogtekort, gedurende die groeisiklus. Hy onderneem om 'n artikel in hierdie verband te skryf, vir publikasie in die Canolafokus.

      1. Dat kennis geneem word dat 'n artikel geskryf sal word oor die mate waarin 'n canolaplant reageer teenoor veral strem­mings­toestande, en spesifiek 'n vogtekort, gedurende die groeisiklus, vir publikasie in die Canolafokus.

        Prof Agenbag
        Canolawerkgroep


  10. Behoeftes van

    1. Die canolamark

      Geen verslaglewering.

    2. Canolaprodusente

      1. Pryse

        Die Voorsitter noem dat Southern Oil Ltd (SOILL) se canolaprysinligting daagliks beskikbaar gestel word.

      2. Canola opbrengskompetisie

        Die Voorsitter noem dat die canolakompetisieprysuitdelingsfunksie na afloop van die vergadering aangebied sal word. Hy spreek die PNS se waardering uit teenoor diegene wat hulp verleen het met die kompetisie.

  11. Saad

    1. Beskikbaarheid van saad

      Daar word rapporteer dat Pioneer Australië aangedui het dat die toewysing van saad na Suid-Afrika gesny sal word. Koue weer en nattigheid het tot gevolg gehad dat die Australiërs nie oor voldoende saad vir hul eie behoeftes sal beskik nie.

      Kennis word geneem dat die ander saadmaatskappye voldoende saad sal kan invoer.

      Die Voorsitter sê die probleem van tekorte in plaaslike saadbeskikbaarheid kan oorkom word, deur saad plaaslik te vermenigvuldig.

  12. Ander sake

    1. Nuusbrokkies

      Kennis word geneem van die nuusbrokkies wat by die dokumentasie ingesluit is as deel van Bylae I.

    2. Tydskrifartikels: canola

      Kennis word geneem van die canolaverwante artikels wat by die dokumentasie ingesluit is as deel van Bylae J.

    3. Sprekers wat oorweeg word vir toekomstige Canolawerkgroep-vergaderings

      1. Spreker: Mnr Dewald van Dyk, RovicLeers – "Nuutste ontwikkelings en ervarings met verskillende tipes oopmakers en plantmeganismes"

        Mnr Van Dyk bied in sy voorlegging 'n oorsig van die nuutste ontwikkelings en ervarings met verskillende tipes oopmakers en plantmeganismes. Hy sê RovicLeers is van mening dat dié maatskappy met die toerusting wat verskaf word 'n verskil kan maak aan sekere kritiese areas ten opsigte van die plantproses, te wete akkurate en eenvormige kalibrasie, kunsmisplasing, konstante plantdiepte, -digtheid, -stand en plantreste. Hy verskaf voorts detail oor die werk wat die afgelope paar jaar in dié verband gedoen is, en van verdere ontwikkelings wat in die vooruitsig gestel word.

        Die Voorsitter bedank Mnr van Dyk vir sy interessante voorlegging.

      2. Voorlegging: Eienskappe en gebruik van canola-olie, SOILL

        Kennis word geneem van die afskrif van die voorlegging oor die eienskappe en gebruik van canola-olie, wat tydens die vorige vergadering aangebied is.

  13. Volgende vergadering

    Kennis word geneem dat die volgende Canolawerkgroepvergadering aangebied word op 15 Junie 2017.

  14. Afsluiting

    Die Voorsitter bedank die lede vir hul deelname tydens die vergadering. Die lede word 'n geseënde Kersfees en aangename rustyd toegewens. Aangesien daar geen verdere sake vir bespreking is nie, word die vergadering om 12:10 as gesluit verklaar.